Saturday, March 10, 2012

तेथ नेई पांडुरंगा

जेथ अमृताचे तळे
त्यात वैराग्यकमळे 
कैवल्याचे दाट मळे 
तेथ नेई पांडुरंगा

जेथ नाही द्वेष, क्षोभ
मोह-माया, क्रोध-लोभ
दु:ख, व्यथेचा प्रक्षोभ
नाही जाणिवांचा दंगा
तेथ नेई पांडुरंगा

जेथ जीव विसावेल
भावसमाधी लावेल
माझ्या तृषेला लाभेल
तुझ्या चरणीची गंगा
तेथ नेई पांडुरंगा

जेथ मांगल्याचा गंध
तुझ्या नामाचा मरंद
जेथ गातील स्वच्छंद
सूर तुझिया अभंगा
तेथ नेई पांडुरंगा

जेथ ब्रम्हांडाचे मूळ
संतचरणांची धूळ
असे अद्भुत राऊळ
दावी लोचनां श्रीरंगा
तेथ नेई पांडुरंगा 

2 comments:

  1. नाही जाणिवांचा दंगा
    तेथ नेई पांडुरंगा. grt.

    ReplyDelete