मैत्र

संवाद साधू पाहता 
वादात होते परिणती 
जमते न गमते तुजविना 

हे मैत्र गमतीचे किती

मैत्रीत नसते याचना
ना मान ना अपमानही
ना वंचनाही चालते,
ना गर्व ना अभिमानही

ही पारदर्शी काच जी
सुस्पष्ट सारे दाखवी
ना आरसा, जो दावितो
प्रतिबिंब केवळ लाघवी

रुसवे जरी क्षणकालचे,
होतात सारे दूर ते
ना गैरसमजाचे धुके
मैत्री-नभाला घेरते

नकळत तरीही ज्या क्षणी
संबंध होती बंधने,
वेळीच फुंकर घालुनी
जुळवायची दुखरी मने

फणसास काटे बोचरे,
पण आतली गोडी पहा
वादात-संवादातही
मित्रासमीप सदा रहा