शपथ

नवी शपथ घ्यायची, विसरुनी जुनी जायची 
दिले वचन पाळण्या हरघडी मुभा घ्यायची 
असेच फसवून साध्य करतात हेतू कुणी 
कुणी शपथपूर्तता करि जिवा पणा लावुनी 

कितीक शपथा जसे बुडबुडे तशा लोपल्या 
कितीक पण पत्थरावर खुणा तशा राहिल्या 
जरी उलटली युगे, विसरले कधी ना कुणी 
अशाच शपथा अभंग उरल्या जनी-जीवनी 

स्वराज्य घडवायला, स्वजन रक्षिण्या झुंजला 
स्मरून परमेश्वरास शिवबा उभा ठाकला 
लहान वय ते, महान मनिषा जपूनी मनी 
निरागस जनांस मुक्त करण्यास दास्यातुनी 

अधर्म दिसता जरी निजगृही त्वरे ताडिती 
असे जमविले सखे, सहज प्राण जे अर्पिती
मुखे वचन येत ते सफल पूर्तता होउनी
अशाच शपथा विराट असती अनंताहुनी 


वृत्त - पृथ्वी