Tuesday, November 22, 2011

दाद

मौनातला संवाद मी
आभाळवेडी साद मी
संगीत अज्ञातातले
त्याचा अनाहत नाद मी

माझ्यातली मी कल्पना
माझ्यातली मी भावना
माझी मला मी वाचते
घेते सुखे आस्वाद मी

हळुवार माझी स्पंदने
अदृश्य माझी बंधने
नियमांत नियमित बांधले
तरिही कधी अपवाद मी

माझ्याच रंगी रंगते
कैफात माझ्या झिंगते
जे वेड हृदये जिंकते,
ते वेड, तो उन्माद मी

भरतीतली ना लाट मी
घाटातली ना वाट मी
निद्रिस्त मी ज्वालामुखी
जागेन तर उच्छाद मी

उस्फूर्त, उत्कट भाव हे
सृजनात जडले नाव हे
त्याने दिलेली संपदा,
त्या कौतुकाची दाद मी 

No comments:

Post a Comment