तुझी आठवण येते

तुझी आठवण येते सांज घुटमळताना 
तुझ्या वाटेत पाउल पुन्हा पुन्हा वळताना
तुझी आठवण येते मनपाखी उडताना
केशराच्या सागरात सूर्यबिंब बुडताना

तुझी आठवण येते रात दरवळताना
स्वप्न जागे होते नीज पापणीत ढळताना
तुझी आठवण येते चंद्र मेघी दडताना
वाट रोजचीच तरी चाल माझी अडताना

तुझी आठवण येते जीव तळमळताना
आसवांच्या सागरात जन्म विरघळताना
तुझी आठवण येते तुला उलगडताना
माझे दबलेले सूर, तुझ्या अवघड ताना