वेडी आशा

स्वप्नातल्या गावाची वाट शोधत

भिरभिरणारी वेडी आशा

हिरव्या अवखळ पाउलवाटा,

वळणावरचा देखणा पळस,

इंद्रधनू पंखांची फडफड

मावळत्या सूर्याचा लामणदिवा

चुकार ढगाला सोन्याची झालर,

डौलदार राजहंस चंदेरी तळ्यात

आणि -----------

आणि अचानक आलेली वावटळ

धुळीचं वादळ, पिसाट वारा

बेभान पाऊस भरकटलेला

उदास धुक्याचे गहिरे पडदे,

कोंदटलेल्या दाही दिशा

उरी दाटून आलेले श्वास,

आसवांनी भरलेले काजळकाठ

-------------------

पायांखालची वाट कुठे

हरवून गेली, कळलंच नाही !

भिरभिरणारी वेडी आशा

अजून तिथेच, त्याच वळणावर

स्वप्नातल्या गावाची वाट शोधतेय!