Sunday, January 22, 2012

भैरवी

ओल्या सुरावटींच्या संमोहनात आहे
ग्रीष्मातही खुळी मी मल्हार गात आहे

माझेच सूर त्याला सांभाळता न आले
गंधार छेडते मी, तो धैवतात आहे !

बेसूर फक्त नाही, बेताल मी, तरीही
जिंकेन मैफली या वेड्या भ्रमात आहे

वेडी अबोल आशा देते उगा दिलासा,
'कंठात शोधसी का? गाणे मनात आहे'

संवादिनीस माझ्या नाहीच वर्ज्य काही
षड्जास टाळण्याचा त्याचा प्रघात आहे

गाता जरी न आले, हेही कमी न झाले
नाते तरी सुरांशी जोडून जात आहे

'मैफल सरेल आता, जा, भैरवी तरी गा'
आदेश हा कुणाचा? मी संभ्रमात आहे 

5 comments:

  1. सगळेच शेर एकसे एक सुंदर.
    अर्थात शेवटचा शेर (मक्ता म्हणतात ना याला ?)
    सर्वांवर कळस...... ग्रेट

    ReplyDelete
  2. मन:पूर्वक धन्यवाद.

    ReplyDelete