जरा वेगळे वाटते

रोजचेच तारांगण जरा वेगळे वाटते 
मोजू पहाता चांदण्या गच्च धुक्याने दाटते 

पायाखालची ही वाट रोजचीच, सरावाची
वाटते का अनोळखी खूण माझ्याच गावाची ?

वेगळीच दिसे मूर्ती, तीच माती तोच साचा
रंग, कुंचलेही तेच, भास वेगळ्या रंगाचा

गुलमोहराच्या खाली झुले रोजच्यासारखी
वेगळ्याच खांद्यावर दिवास्वप्नाची पालखी

वाटे कवेतच आहे, तरी कल्पांतापल्याड
काही केल्या उघडेना आज मनाचे कवाड

जरा वेगळे वाटते, काय, कसे आकळेना
अर्थ शब्दाला मिळेना, शब्द सुरात ढळेना