नकळत सुचलेलं, इथं तिथं सांडलेलं

* वर्षात एकदा होते
हे संभाषण ओझरते
तो दूरदूर दरवळतो,
मी आत आत मोहरते !

*फुटतो दगडांनाही पाझर, म्हणती सारे
इथल्या दगडांना ही जाणिव नसते का रे ?

* तसे फार नाही, जरासे मिळाले
कधी चांदणे अन् कधी काहिली
अपेक्षा तशी फार तेव्हा न होती,
न आता मनी आस ती राहिली

* आखलेल्या, रूढ वाटांशी समांतर
होतसे माझ्यातल्या माझे स्थलांतर

* उगाच पत्र किती मायन्यात लांबवले
सुरू जिथून करावे, तिथेच थांबवले !

* शब्द दिल्या-घेतल्यानं स्वप्नं वाहून जातात
पापण्यांच्या काठावर ठसे राहून जातात

* तिला मोत्यांची झळाळी
तिची काया सोनसळी
माझ्या वेदनेची आहे
वेगळीच जातकुळी

* सांग माझ्या दैवात काय आहे?
गूढ जन्माला घेरुनीच राहे
घालते मी नौकेस ज्या प्रवाही,
तो क्षणी का भलत्या दिशेस वाहे ?