भांडण

ज्याच्या-त्याच्या तत्वासाठी भांडत आलो आपण नियमित 
घरपण विसरुन घरही झाले आखाडा किंवा रण नियमित 

कधी सकारण, कधी अकारण अहंकार गोंजारत गेलो 
निसटत गेले परस्परांना समजुन घेण्याचे क्षण नियमित 

'इथे सुखाला प्रवेश नाही' अशी सूचना दरवाजावर 
तिरसट वागुन घालत गेलो आनंदावर विरजण नियमित 
कुठल्या वळणावरून येइल वादग्रस्त प्रश्नांचे वादळ,
कुंपण, फाटक, छप्पर, भिंती यांच्यावरही दडपण नियमित 

चुका कुणाच्या, दोष कुणाचे पुन्हापुन्हा याचीच उजळणी 
कोण किती तर्कटी नि ताठर, या मुद्द्यावर भांडण नियमित 

शांतपणावर उदक सोडले, विश्वासाचे श्राद्ध घातले 
विवेक, संयम, विचारशक्ती यांच्या नावे तर्पण नियमित 

एकच रस्ता तरी न मिटले मनामनातिल अनंत अंतर 
'आपण' नाही झालो, जपले 'तू-पण' आणिक 'मी-पण' नियमित