Sunday, June 19, 2011

परीस

खुशीत यावा पहाटवारा, धुके झरावे हळूहळू
सुगंध माळून सायलीने फुलून यावे हळूहळू

मिटून जाव्या जुन्या खुणा अन् तुटून जावीत बंधने,
नव्या दिशेला नवीन वाटेवरून जावे हळूहळू

उगाच काटे जपायचे की मनाप्रमाणे फुलायचे,
झुरायचे की झुलायचे हे तुला कळावे हळूहळू

उदासवाण्या नको विराण्या, नवे तराणे मला हवे,
अबोल तारा सुरांत येता सुनीत गावे हळूहळू

पुन्हापुन्हा आठवांत राती सरायच्या, ओसरायच्या
कळ्या स्मृतींच्या खुडून, जावे उडून रावे हळूहळू!

असा मिळावा परीस ज्याने सुवर्ण व्हाव्यात वेदना,
व्यथेस यावा झळाळ, दु:खास तेज यावे हळूहळू

Monday, June 13, 2011

तुला पावसाची आण

तेच थेंब, त्याच सरी, तोच तो खट्याळ वारा
नवानवासा वाटतो, जरी तोच तो इशारा

तेच थेंब, त्याच सरी, तीच पागोळ्यांची गाणी
त्याच मातीच्या गंधाची नवीन अत्तरदाणी

तेच थेंब, त्याच सरी, त्याच कागदाच्या नावा
नव्या उत्साहाने वाट जाते स्वप्नातल्या गावा

तेच थेंब, त्याच सरी, गाभुळलं रानोमाळ
मोर नाचतो धुंदीत, थेंबांचे बांधून चाळ

तेच थेंब, त्याच सरी, तरी नव्हाळी नव्हाळी
गंधगीत गात डोले माझी बकुळडहाळी

तेच थेंब, त्याच सरी, तोच सुरेल मल्हार
आसुसल्या धरणीला नवा हिरवा शृंगार

तेच थेंब, त्याच सरी, नवं सृजनाचं वाण
दे ना मलाही उदारा, तुला पावसाची आण!

Saturday, June 11, 2011

घन

घन व्याकुळला तेव्हा मी त्याचीच सावली होते
घन कोसळताना त्याच्या अस्वस्थ चाहुली होते

घन रसरसला, मोहरला, मी नवी पालवी ल्याले
घन फाल्गुनातल्या रानी मी पळसपाकळी होते

घन घुटमळला, विरघळला किरणांच्या धुंद मिठीत,
घन रासरंग गगनात, मी सांज सावळी होते

घन शापित गंधर्वाच्या कंठात मुक्त गंधार,
घुमविता सखा मल्हार मी तान त्यातली होते

घनगर्द घनाची छाया, घननीळ घनाची माया
घनघोर गर्जला तेव्हा मी रात्र वादळी होते

घन मनात, घन देहात झिरपून झरे प्राणांत
घन कणकण भिजवत होता, मीही तहानली होते!