अभेद्य

माझ्या अभेद्य मनाचा
निखळतो चिरा चिरा
फटींतून उधाणतो
तुझ्या स्मरणांचा वारा

मोडकळला चौथरा,
उंबऱ्याला अवकळा
उडे कळसाचा रंग,
सुन्न, विषण्ण गाभारा

भंगलेल्या शिल्पांतल्या
छिन्नविच्छिन्न आकृती,
तशी विखुरली स्वप्ने
घालतात येरझारा

भर मध्यान्हीचं ऊन
अस्थींवर पांघरून
रिता निष्पर्ण प्राजक्त
शोधे प्राणांचा उबारा

वठलेल्या फांदीवर
तुझ्या शपथेचा पक्षी
मोडलेल्या वचनांची
आर्त भैरवी गाणारा