त्या सांजकोवळ्या उन्हात सजल्या वाटा
गुणगुणती गीते तुझी निरागस लाटा
मावळतीवरती रंग नवे क्षितिजाचे
पाऊल वाजते हलके बकुळफुलांचे
माडांच्या छाया झुलती वा-यासंगे
जणु कृष्णसख्याचा रास आगळा रंगे
आसमंत भारित सूर मुरलीचे आले
कालिंदीचे जल थबके, कदंब डोले
तो मऊ मुलायम स्पर्श मयुरपंखाचा
दरवळतो हलका भास मधुर गंधाचा
या चराचराला जडली त्याची बाधा
श्रीरंग घन निळा, सांज सोनुली राधा
No comments:
Post a Comment