चकवा

समजूत का? कशाला? रुसवा कधी न होता
लटका विरोध माझा कडवा कधी न होता

विनवायची जरी मी, म्हटलेस त्यास आज्ञा,
हलकेच बोल होते, फतवा कधी न होता

झुकण्यात जन्म सारा सरला, मिटून गेला
बुजरा स्वभाव खोटा, फसवा कधी न होता

फुलले न फारशी, ना बहरून धुंद झाले
ऋतु कोणताच माझा नटवा कधी न होता

मनमोकळे कधी ना रडले, न हासले मी
नव्हते कठोर, बाणा हळवा कधी न होता

जळती मशाल किंवा विझली न राख होते,
धुमसायची जराशी, वणवा कधी न होता

इतकेच जाणते की जगणे खरेच होते,
नुसताच भास किंवा चकवा कधी न होता