Saturday, April 9, 2011

चकवा


समजूत का? कशाला? रुसवा कधी न होता
लटका विरोध माझा कडवा कधी न होता

विनवायची जरी मी, म्हटलेस त्यास आज्ञा,
हलकेच बोल होते, फतवा कधी न होता

झुकण्यात जन्म सारा सरला, मिटून गेला
बुजरा स्वभाव खोटा, फसवा कधी न होता

फुलले न फारशी, ना बहरून धुंद झाले
ऋतु कोणताच माझा नटवा कधी न होता

मनमोकळे कधी ना रडले, न हासले मी
नव्हते कठोर, बाणा हळवा कधी न होता

जळती मशाल किंवा विझली न राख होते,
धुमसायची जराशी, वणवा कधी न होता

इतकेच जाणते की जगणे खरेच होते,
नुसताच भास किंवा चकवा कधी न होता


4 comments:

  1. सुरेख !

    फुलले न फारशी, ना बहरून धुंद झाले
    ऋतु कोणताच माझा नटवा कधी न होता
    ... छान !

    ReplyDelete
  2. एकदम मस्त गझल.

    "फुलले न फारशी, ना बहरून धुंद झाले
    ऋतु कोणताच माझा, नटवा कधी न होता"
    हा शेर सर्वात जास्त आवडला

    ReplyDelete
  3. मस्त! मलाही "फुलले न फारशी.." आवडलं.

    ReplyDelete
  4. अप्रतिम
    लटका विरोध माझा कडवा कधी न होता..

    ReplyDelete