खुळा पाऊस

जाणून धरेचा ध्यास 
खुले आकाश 
अचानक भरले 
घन गर्द दाटता
गात्र गात्र मोहरले 

चाहूल सख्याची घेत 
हळूच कवेत 
लाजली धरती 
घन निळे-जांभळे 
झरले वृक्षांवरती 

पाण्यात पाहती बिंब 
सुखाने चिंब 
तरूंवर वेली
सत्यात उतरली 
स्वप्ने रंगवलेली 

दरवळे हवासा गंध 
कराया धुंद 
बरसले पाणी 
सुचवून फुलांना 
थेंबनाचरी गाणी 

ओढाळ मनाची आस 
तुझे आभास 
घनागत झरले 
मन दाटुन येता 
व्याकुळ डोळे भरले 

घनरिते पापणीबंध 
अनावर गंध 
तरळला भवती 
फिरफिरुन स्मृतींची
तृणपाती लवलवती 

हा असा खुळा पाऊस 
नको देऊस 
पिसाट मनाला 
बरसेल घनातुन 
जाळिल आत जिवाला