मेघश्याम जादुगारा

डोळां स्वप्न दावण्याची 
जीवा ओढ लावण्याची
तुझी निराळीच तऱ्हा
मेघश्याम जादुगारा

तुझ्या पावरीचे सूर
मोहवून नेती दूर
ध्यानीमनी नसताना
पायी नादती नुपूर
चित्ततार छेडण्याची
संभ्रमात पाडण्याची
तुझी निराळीच तऱ्हा
मेघश्याम जादुगारा

यमुनेच्या तीरावर
येते घेऊन घागर
पांघरून निळेपण
तुझे तनामनावर
रंग-गंध शिंपण्याची
देह-प्राण जिंकण्याची
तुझी निराळीच तऱ्हा
मेघश्याम जादुगारा

तुझा मनात निवास
तरी दुरावा दिलास
तुला भेटण्यासाठीच
जन्मभराचा प्रवास
द्वैतभाव मोडण्याची
जिवा-शिवा जोडण्याची
तुझी निराळीच तऱ्हा
मेघश्याम जादुगारा