अतर्क्य

दोन जिवांचे असे गुंतणे 
अतर्क्य सारे, अगम्य सारे 
वास्तवातही स्वप्न गुंफणे 
अतर्क्य सारे, अगम्य सारे 

एकतानता किती असावी, 
एकरूपता किती असावी?
भिन्न देहि मन एक नांदणे 
अतर्क्य सारे, अगम्य सारे 

भेट जीवनी क्वचितच घडते
तरी कधी ना अंतर पडते 
दूर दूर, तरि तीच स्पंदने 
अतर्क्य सारे, अगम्य सारे 

गूज कधी अपुले सांगावे 
कधी आसवांतून झरावे 
कधी काहिली, कधी चांदणे 
अतर्क्य सारे, अगम्य सारे 

जशी मंदिरी ज्योत तेवते
तशी भावना मनात वसते 
मेघ-धरित्री तशी बंधने 
अतर्क्य सारे, अगम्य सारे 

नाव न या नात्याला काही 
नसे दूरता, जवळिक नाही 
द्वैतातुन अद्वैत सांधणे 
अतर्क्य सारे, अगम्य सारे